ראשי > תנ''ך > תהלים >


תהלים ד

1 למנצח בנגינות מזמור לדוד.
2 בקראי ענני אלהי צדקי בצר הרחבת לי חנני ושמע תפלתי.
3 בני איש עד-מה כבודי לכלמה תאהבון ריק תבקשו כזב סלה.
4 ודעו כי-הפלה יהוה חסיד לו יהוה ישמע בקראי אליו.
5 רגזו ואל-תחטאו אמרו בלבבכם על-משכבכם ודמו סלה.
6 זבחו זבחי-צדק ובטחו אל-יהוה.
7 רבים אמרים מי-יראנו טוב נסה-עלינו אור פניך יהוה.
8 נתתה שמחה בלבי מעת דגנם ותירושם רבו.
9 בשלום יחדו אשכבה ואישן כי-אתה יהוה לבדד לבטח תושיבני.

ראשי > תנ''ך > תהלים >


תוספות ותגובות